A Asociación ACADAR (Asociación de mulleres con discapacidade de Galicia) e o Concello de Porto do Son impulsan de xeito conxunto, este verán, unha nova edición do Programa Enrédate de obradoiros grupais e individuais dirixidos á poboación feminina con diversidades funcionais e cognitivas e en risco de exclusión e vulnerabilidade.
O obxectivo deste servizo gratuíto é promover accións a prol da igualdade abordando temáticas como a autoestima, a xestión emocional, a sexualidade, as habilidades sociais ou a prevención de violencias machistas. O programa desenvolverase os días 8, 10, 12, 15, 17 e 19 de xullo no Centro de Interpretación do Castro de Baroña. As inscricións están abertas na Área de Benestar Social ou no 673 142 212.
