Este martes 25 de xuño o Concello, a Corporación e a cidadanía de Ribeira van render homenaxe á actriz local Susana Sampedro (Ribeira, 1978), recentemente distinguida co Premio Mestre Mateo 2024 á mellor actriz de reparto na longametraxe Matria, de Álvaro Gago, destacado filme galego (éxito de público e de crítica) onde Susana interpreta o papel de Carme. O Concello lanzou un convite á veciñanza para que asista e participe no acto de recoñecemento “da nosa querida veciña”.
Susana Sampedro é unha das actrices galegas máis destacadas do panorama audiovisual actual. Compaxina as súas facetas de actriz en televisión e cinema (Matria, O Faro, Serramoura, Fariña…) e en teatro (Invisibles, Idiota,…) coas súas facetas de cantante e actriz de dobraxe. Tamén colabora no estudo de formación actoral de Fernando Tato Adestramento Actoral.
