O tenente alcalde de Outes e concelleiro de Cultura Anxo Núñez deu a coñecer a inclusión do municipio no Circuíto Audaces (Circuíto Estatal de Artes Escénicas para Audiencias Escolares), o que converte a Outes no primeiro e único territorio de toda Galicia que acada a adhesión á dita iniciativa, cuxo obxectivo é promover e fomentar a mobilidade de espectáculos dirixidos ao público escolar, amais de potenciar a cohesión social no territorio e sensibilizar sobre a importancia de incluír as artes escénicas como valor educativo dentro dos proxectos curriculares dos centros.
A inclusión de Outes no proxecto foi dada a coñecer por Anxo Núñez e máis polo técnico de cultura local Santiago Nieto. Núñez salientou as posibilidades que se abren con esta adhesión, achegando a cultura á rapazada e á mocidade e incrementando a oferta de lecer do Concello. Segundo engadiu, a adhesión comezará a materializarse este ano 2024.
Nieto explicou que Outes será o único territorio galego que formará parte do circuíto, integrado por 17 espazos estatais. Tamén fixo saber que Audaces non só pon o foco na exhibición, senón tamén na implicación e na participación. O catálogo de Audaces incorpora unha trintena de espectáculos, delas a rapazada e a mocidade de Outes poderá gozar, nun principio, dun total de catro.
