O director xeral de Maiores e Atención Sociosanitaria, Antón Acevedo, e o alcalde de Ribeira, Luís Pérez Barral, participaron este venres 7 de xuño no acto de diplomatura do programa universitario de maiores IV Ciclo que impulsan a Universidade de Santiago e a Xunta. Tamén estiveron presentes no acto, celebrado no Auditorio Municipal, a secretaria xeral da USC, Dulce García Mella, e a directora do IV Ciclo da USC, Esther Olveira.
Durante o encontro o director xeral animou os maiores a seguir vivindo unha xubilación activa, chea de actividades e na que sacien a súa curiosidade e ganas de aprender.
O Programa Universitario de Maiores IV Ciclo da Universidade de Santiago de Compostela é unha acción educativa regrada en conexión cos programas educativos doutros ciclos que se imparten na USC e ofrece dous títulos propios, o Diploma Sénior e o Diploma Excelsor.
O Sénior, que consta de cinco cursos, celebrou este ano por vez primeira o seu acto de diplomatura na capital do Barbanza, onde cursan os seus estudos 50 alumnas e alumnos, e ao que tamén estivo convidado o alumnado de Santiago (285 alumnos e alumnas, o de Lugo (194) e o de Vilagarcía (39).
O IV Ciclo
O IV Ciclo Universitario é unha oferta educativa da Universidade específica para estudantes maiores de 50 anos, con independencia do seu nivel educativo previo, para dar resposta á crecente necesidade de formación que existe en Galicia entre persoas de idade avanzada. O programa comezou a impartirse no curso 1997-98 e desde aquela foi aumentando exponencialmente a súa matrícula ata chegar hoxe aos milleiros de estudantes. A día de hoxe, IV Ciclo conta con seis programas distintos: Diploma Senior, Diploma Excelsor, programa de seminarios, Destacando na Ciencia, Democratización do Coñecemento e IV Ciclo itinerante.
Para a obtención do título de diplomado Sénior en IV Ciclo é necesario superar cinco cursos, nos cales se deben completar os 60 créditos da titulación. En cada curso haberá que superar un mínimo de catro materias optativas, das consideradas materias permanentes no plano de estudos, e tamén poderán cursarse até tres créditos mediante actividades complementarias recoñecidas. As persoas diplomados Sénior en IV Ciclo poderán optar á obtención do Diploma Excelsor en IV Ciclo.
