A Asociación Francisco Lorenzo Mariño de Aguiño que preside Elvira Pisos vai organizar esta semana a sétima edición do Festival Son´s de Música e Canto Tradicional, con sede en Aguiño. O certame desenvolverase o vindeiro sábado 22 de xuño no Conservatorio, coa participación de seis grupos chegados de Corrubedo, Castiñeiras, Ribeira e Aguiño, coa anfitrioa, o grupo As 7 linguas que pertence á asociación.
Participarán preto de 150 persoas de diferentes idades (dende nenas a maiores) chegadas doutras vilas e parroquias que forman parte das ditas agrupacións.
O festival é aberto e gratuíto a calquera persoa, ás 21 h, polo que abrirá as súas portas 1/2 h antes.
Ao rematar o acto, a asociación entregará uns agasallos conmemorativos aos grupos participantes e organizará unha foliada libre onde poderá participar calquera persoa que “teña gañas de cantar, tocar e bailar”, sinalou a entidade que leva o nome do párroco de Aquiño, engadindo que as persoas que o desexen poderán traer tamén “algo de beber e comer para sumar ao que poña a asociación para esta festiña compartida entre todos”.
