O Centro Cultural Lustres Rivas acolle este xoves 9 de maio a presentación do libro Ouveos fractais, da escritora da nosa comarca Patricia Torrado Queiruga, que estará acompañada na cita literaria pola arpista Clara Pino. Tamén participará a concelleira de Cultura de Ribeira, Antía Alberte. A presentación dará comezo ás 20.30 horas. As persoas que asistan ao acto recibirán como agasallo un exemplar da obra.
Patricia Torrado Queiruga, nada en Porto do Son en 1987, é unha escritora, xornalista e museóloga galega, ademais de experta en conservación e restauración do patrimonio e activista cultural. En 2020 gañou o Certame Manuel Murguía de narracións breves co relato Silencios náufragos. En decembro de 2020 obtivo o primeiro premio no III Certame de Poesía Torre de Caldaloba coa obra Herdar a fala.