O Concello de Boiro anunciou a contratación das obras de reforma do mercado de abastos, cun orzamento basee de licitación de 145.657 euros e un prazo de execución de tres meses. Este proxecto conta co cofinanciamento do Ministerio de Industria, Comercio e Turismo no marco do Plan de Recuperación, Transformación e Resiliencia.
As reformas previstas inclúen a instalación de sistemas de alumado tipo LED e sinalización, o revestimento de chans e paredes, pintura e acristalamento, así como diversos traballos de decoración. Entre as melloras específicas atópanse a colocación de biombos de aceiro inoxidable, unha malla soldada e unha corda decorativa de fibra natural ancorada ao teito na zona de peixaría.
As empresas interesadas teñen ata o 4 de xuño para presentar as súas ofertas a través do sistema electrónico da plataforma de contratación do Estado. Os criterios de avaliación inclúen ata 15 puntos para a mellor oferta económica e un máximo de 20 puntos pola redución do prazo de execución. Ademais, outorgaranse ata 20 puntos baseados na porcentaxe de persoal fixo e a cantidade de mulleres empregadas na empresa.
En canto aos criterios non avaliables mediante fórmulas, asignaranse ata 19 puntos ao contido do programa de traballo e ata dous puntos adicionais para o plan de control de calidade, o programa de actuación ambiental e o esquema do plan de seguridade e saúde. As empresas que non obteñan polo menos o 50% dos puntos na primeira fase, que inclúe os criterios de valoración do plan de control de calidade, programa de traballo e de actuación ambiental, e o esquema do plan de seguridade e saúde, serán excluídas da segunda fase e, por tanto, da adxudicación do contrato.
