O Concello de Ribeira vén de adxudicar a renovación da praza dos Estudantes de Ribeira cun orzamento de 82.227,20 euros un prazo de execución de 6 meses.
Segundo lembraron fontes do Consistorio, a praza dos Estudantes atópase moi deteriorada: “Ademais de presentar un deseño que impide que o espazo sexa accesíbel, a pérgola que percorre a contorna ten problemas coa impermeabilización, de aí que se presentase a mellora do equipamento, de maneira que estea libre de obstáculos e garanta unhas condicións de seguridade axeitadas”.
As actuacións que se desenvolverán consisten na substitución do pavimento da praza por unha nova capa de formigón, na renovación do revestimento das plataformas existentes e na reparación da pérgola. Ademais; o proxecto contempla o recheo do foso existente con terra vexetal fertilizada para a posterior plantación de céspede e distintos tipos de arbustos.
O axardinamento da praza e a renovación da pérgola son “investimentos pensados para mellorar a calidade de vida da comunidade proporcionando un ambiente atractivo, saudábel e funcional para todas as persoas que frecuentan este espazo público”, explicou o alcalde Luís Pérez, engadindo que dende “o Goberno municipal seguirase a traballar para a ampliación e mellora das zonas verdes en todo o Concello, co propósito de embelecer a paisaxe urbana e reforzar o tecido social; promovendo un estilo de vida activo e sustentábel”.
