Ao longo desta semana que acubilla o Día das Letras Galegas, que se celebrará o vindeiro venres 17 de maio e que ten como homenaxeada á poeta Luísa Villalta, a Concellaría da Cultura da Pobra do Caramiñal levará a cabo tres actividades para festexar esta data: unha presentación literaria, unha feira e xogos populares.
Indo ao miolo das propostas culturais, o xoves 16 de maio, ás 20 horas, será Esperanza Mariño quen presentará o seu libro As escumas da letra. Biobibliografía de Luísa Villalta, o acto terá lugar no Auditorio do Museo Valle-Inclán. Participarán, ademais da propia autora: o concelleiro da Cultura; Xesús Laíño, da A. C. Barbantia; e Belén López, editora. Haberá unha palestra e repartiranse exemplares como agasallo até esgotar as existencias.
En canto ao mesmo Día das Letras Galegas, venres 17 de maio, O Cantón da Leña será epicentro da Feira do 17. Haberá animación de rúa con Trécola, a partir das 11.30 horas, para arredor das 12 horas, proceder á apertura da feira con postos de restauración, polbeira, artesanía, obradoiros infantís e xogos populares. As actuacións de música e baile tradicional comezarán a partir das 12.30 horas con Arrancadeira, Caramiñas, Eiradela, Trécola e Xiada. E Tanto Nos Ten animará o ambiente a partir das 13.30 horas. Xa na xornada do sábado 18 de maio, das 17 ás 20 horas, o parque do Castelo converterase nun particular campo de xogos populares a cargo de Somos Enredos, encontro aberto a tódalas crianzas.
