CONGALSA, empresa especializada en alimentación con sede na Pobra do Caramiñal, vén de obter un novo e importante recoñecemento, desta volta polo seu labor en materia de responsabilidade social e sustentabilidade, un compromiso que ten a corporación coas persoas e o medio ambiente, co obxectivo de ser axentes de cambio positivo na contorna.
Deste xeito, as accións que desde hai anos fóronse instaurando en materia de xestión de recursos, de materias primas, de políticas sociais, creación de redes de apoio locais e compromiso coas persoas, víronse recoñecidas co Premio de Excelencia Empresarial de Arinaga 2023 en categoría de Gran Empresa. Cabe destacar que CONGALSA conta cunha delegación nas illas Canarias.
O lugar elixido foi o salón de plenos do Concello de Agüimes.
Estes galardóns, promovidos pola Entidade de Conservación da Zona Industrial de Arinaga (ECOAGA) e pola Asociación Empresarial da Zona Industrial de Arinaga (AENAGA), coa colaboración do Concello de Agüimes, teñen como obxectivo recoñecer as boas prácticas empresariais de Arinaga nos ámbitos da Economía do Ben Común (EBC), a Responsabilidade Social Corporativa (RSC) e a contribución aos cumprimentos dos Obxectivos para o Desenvolvemento Sostíbel (ODS).
