O BNG de Dodro cualificou o proxecto de Altri no río Ulla de “bomba ambiental”

05 Abril 2024

O BNG de Dodro organizou este xoves 4 de abril unha charla informativa para toda a veciñanza sobre o proxecto de Altri en Palas de Ulla. A sesión foi unha mesa informativa sobre esta iniciativa industrial programada pola empresa portuguesa na que se presentou un vídeo protagonizado pola veciñanza que sintetiza as accións que está levando a cabo o BNG ante este macro-proxecto. A charla foi inaugurada polo portavoz local do BNG, Xoán Bautista Mariño, que logo dunha breve intervención deu a palabra a Xaquín Rubido, voceiro da Plataforma en Defensa da ría de Arousa, a Fins Eirexas de ADEGA, e á parlamentaria do BNG Iria Carreira.

Entre todas debullaron a historia do proxecto industrial de Altri, que, segundo fixeron saber, “vai contra as economías produtivas da zona da Ulloa, río Ulla e Arousa” e que, de ir adiante, “destruiría un modelo sustentábel, postos de traballo e a riqueza ambiental dos sitios por onde se estenda a contaminación xerada por unha industria que busca en Galiza o que non lle permiten en Portugal”. Dixeron que “a ocultación de información sobre o proxecto é explicábel por criterios políticos en connivencia con intereses industriais que atentan contra nós”.

Os relatores lembraron que a través do DOG, o pasado 4 de marzo (días despois das eleccións autonómicas), sóubose da magnitude do proxecto da empresa portuguesa para o corazón do país, que, segundo lembraron, “consumirá auga do encoro de Portodemouros para fabricar celulosa e en menor cantidade Lyocell, 46.000 m3/día e verterá ao río Ulla -do que beben desde Padrón a Ribeira- 30.000 m3/día”.

As dimensións da denominada “bomba ambiental”, sinalou Xaquín Rubido, “serían o punto e final da xa maltratada ría de Arousa, da que só en emprego directo dependen miles de persoas”. Rubido dixo que os datos falan por si sós: “A planta multiplicará por 10 a actual celulosa de ENCE en Pontevedra e xerará 400.000 toneladas de produción anual de pasta de papel”. Fins Eirexas aclarou as implicacións para a Ulloa e para as ribeiras do Ulla ao mesmo tempo que dixo “que se trataba dunha chapuza como proxecto, insultante para as galegas e que de obviar os sectores produtivos de gandaría, agricultura, turístico, marisqueiro e pesqueiro iniciaríanse outras accións vía xudicial ante unha empresa consumidora dos recursos galegos que non reverten no país se non só na empresa que actúa como colonizadora”.

Pola súa banda a deputada nacionalista Iria Carreira cualificou de “escurantista” a actitude da empresa e do Goberno galego.

A xente que encheu o local municipal aplaudiu o vídeo resumo do BNG protagonizado pola veciñanza de Dodro e esgotou as reclamacións repartidas tamén por establecementos de todo o concello para seren entregadas no rexistro da Xunta. O BNG anunciou máis accións de protesta antes de que acabe o período de alegacións a mediados deste mes.

Outros artigos

Domingo regresa o sol e empeza a subir a temperatura

Na xornada do domingo seguiremos con aire frío en altura xerando inestabilidade atmosférica. Unha situación que favorecerá a formación de chuvascos, localmente treboentos, máis probables e frecuentes no interior e nas horas centrais do día. As temperaturas mínimas...

+

Ribeira pon en valor o traballo das mulleres no mar

O Concello de Ribeira conmemorou o Día Internacional da Muller no Sector Marítimo rendendo unha homenaxe a tres mulleres extraordinarias que dedicaron as súas vidas a unha profesión fundamental para a nosa comunidade: o marisqueo. O concelleiro de Mar, Fernando...

+

Publicidade

Revista en papel

Opinión

“Día das Letras Galegas 2025”. Manuel Dominguez

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...