A semana pasada celebrouse en Porto do Son o curso gratuíto Muller e Saúde, programado pola formadora Begoña García Cepeda. A actividade formativa, moi concorrida, foi inaugurada no local do Club de Xubilados polo concelleiro de Benestar Social, Pepe Lijó, e a traballadora social municipal, Isabel García. O curso, encadrado nas actividades que organizou o Concello con motivo do Día da Muller (o pasado 8 de marzo), foi impartido por Paula Sánchez Flores, matrona do Complexo Hospitalario da Coruña, cos obxectivos de “mellorar a información e comprensión dos cambios evolutivos na muller e previr enfermidades propias do colectivo feminino”.
A actividade veu da man da Escola Galega de Saúde, a axencia ACIS de coñecemento en saúde e o Concello de Porto do Son. Abordáronse cuestións como os cambios evolutivos na muller e, tamén, como previr enfermidades propias do colectivo feminino. Nun plano máis concreto, púxose o foco na menopausa e na osteoporose, na prevención xinecolóxica, nos factores de risco, nos recursos de fisioterapia que teñen as participantes ao seu dispor e nos beneficios dunha alimentación saudábel e do exercicio.
