Dende O Concello de Boiro informan que o alumnado do Obradoiro de Emprego medioambiental Torre Goiáns III ven de plantar unhas 150 especies autóctonas frondosas na contorna do Polígono Industrial de Espiñeira. Cómpre dicir que estas tarefas forman parte da formación práctica que o alumnado desenvolve en espazos naturais do municipio. Entre as árbores que conforman esta nova plantación atopamos: cerdeiras, castiñeiros, carballos, freixos, ameneiros e bidueiros. Engadir que a finalidade desta actividade é mellorar a paisaxe da contorna do Parque Empresarial así como axudar a frear os incendios forestais.
A formación do Obradoiro de Emprego está dividida en dúas especialidades con 10 alumnos/as en cadansúa. Por unha banda, a especialidade de Instalación e mantemento de xardíns e zonas verdes e, por outra, Repoboacións forestais e tratamentos silvícolas. O alumnado recibe formación teórica e tamén práctica en espazos naturais do Concello ao contar cun contrato de traballo para a formación e aprendizaxe a tempo completo de 40 horas semanais.
Para rematar, dicir que o Obradoiro de Emprego medioambiental Torre Goiáns III do Concello de Boiro lévase a cabo mediante unha subvención de 531.046,20 euros da Consellería de Promoción do Emprego e Igualdade a Xunta de Galicia para a realización de obradoiros de emprego na comunidade autónoma.
