Os Bombeiros de Boiro interviñeron para liberalas tras envorcar co vehículo no que viaxaban na parroquia de San Xoán de Laíño.
Unha das persoas implicadas chamou ao 112 Galicia e explicou que acababa de accidentarse no quilómetro 8 da AC-305. Viaxaba con dúas acompañantes e, en principio, ningunha delas resultara ferida. Non obstante, eran incapaces de abandonar o coche, que quedou envorcado sobre a calzada.
De inmediato, desprazáronse ao punto os membros do GES de Padrón e os Bombeiros de Boiro, que se encargaron de retirar ás tres persoas do vehículo e confirmaron que non precisaban asistencia sanitaria.
Finalmente, encargáronse da limpeza da vía para restablecer as condicións seguras de circulación. Ademais, participaron os servizos sanitarios e a Garda Civil de Tráfico.
