Esta semana proseguen as actividades da nova edición (a número XVIII) das Xornadas Sociosanitarias de Outes e das III Xornadas do Programa Universitario de Maiores (IV Ciclo da Universidade de Santiago). A nova sesión será este mércores 17 de abril, ás 18.30 horas, na Casa da Cultura municipal.
A sesión, centrada en achegar recursos para incrementar a calidade de vida das persoas maiores, desenvolverase baixo o epígrafe Soidade na idade adulta, estratexias preventivas e alternativas de vida para a vellez.
Será impartida polo doutor Miguel Vázquez, especialista en Xeriatría e xerontólogo social, ademais de director da empresa médica Caligers Servizos Sociosanitarios.
O ciclo está a ser coordinado por Xosé Mª Dios Diz, médico especialista de Atención Primaria de Outes.
A cita será novamente na Casa da Cultura da Serra de Outes.
As xornadas veñen da man do Concello (Centro Social e Centro de Saúde), a Sociedade Galega de Xerontoloxía e Xeriatria, a USC, ADISBISMUR e a Asociación Cultural Terra de Outes.
A nova edición das xornadas rematará o 30 de maio, con Saúde mental: saber pedir axuda, a cargo de Rosa Cerqueiro Landín, psicóloga do Complexo Universitario de Conxo.
