A Comisión de Medio Ambiente do Parlamento Europeo ratificou este 19 de marzo o informe sobre o regulamento relativo á prevención das perdas de granulados plásticos co voto a favor do europarlamentario galego Nicolás González Casares.
González Casares sinalou que os socialistas europeos lideraron as negociacións na Eurocámara e con este informe “logramos reforzar as medidas do regulamento, estendendo o seu ámbito de aplicación aos transportistas de fóra da Unión Europea, sector marítimo incluído, co obxectivo de conseguir cero perdas de pélets”.
Apuntou que con este voto o Parlamento di “alto e claro” que non poden volver repetirse situacións como as vividas en Galicia a comezos de ano, cando a “actitude pasiva, a mentira e a actuación deficiente do Goberno da Xunta de Galicia deixou á cidadanía e aos concellos solos ante a marea de granulados, agravando o problema”, sinalou.
Casares incidiu en que, coas propostas do Parlamento, os operadores e transportistas de granulados plásticos estarán obrigados a contar e limpar os vertidos deste material, ao tempo que deberán identificar, almacenar e transportar os contedores de forma moito máis estrita.
O eurodeputado socialista remarcou que “fronte ao sostido polo Goberno galego, trátase de sustancias tóxicas”, como ratificou a Comisión Europea en resposta a unha pregunta presentada polo propio Casares. Engadiu nesta resposta sinálase que “os pélets de plástico teñen repercusións adversas sobre o medio ambiente e posiblemente tamén na saúde humana”.
Precisamente por iso, o eurodeputado socialista galego valorou como unha “vitoria” do Grupo Socialista Europeo a adopción deste informe, no que o PP europeo tratou de rebaixar as propostas da Comisión propoñendo a exclusión dun maior número de operadores e rebaixando as esixencias en canto ás análises que deben levar a cabo sobre o cumprimento da normativa e dos plans de análises de riscos.
