Con motivo do Día Mundial do Teatro e no marco das actividades conmemorativas preparadas pola Deputación da Coruña, o vindeiro mércores 27 de marzo chega ao auditorio municipal rianxeiro o espectáculo Cancións amarelas, Flores tristes de Ernesto Is. por Manekineko. Será na Sala Arcos Moldes do Auditorio de Rianxo, a partir das 20.30 horas.
Trátase dunha obra recomendada para maiores de 16 anos, de 70 minutos de duración. A entrada será de balde, limitada a 120 prazas. (requírese reserva previa preferentemente no formulario ou no teléfono 981 100 688).
Argumento
Catro persoas de idades, xéneros, crenzas e realidades socioeconómicas diferentes, coinciden nun karaoke. Ao longo da madrugada, as cancións e o alcol mestúranse cos medos e cos problemas que as levan a refuxiarse neste lugar, onde constrúen os seus propios paraísos artificiais. Nesta noite hai música, pero tamén silencio; miradas cómplices e mal intencionadas; luces de cores que iluminan o escenario e sombras trala porta do baño; copas escachadas contra o chan e brindes até o amencer; corpos suorentos, tristes e cansos que procuran outros corpos igual de suorentos, tristes e cansos; tarxetas de crédito co saldo esgotado; maquillaxe e perfumes baratos; bágoas que mollan as flores de plástico coas que se decoran as mesas; frustracións, temores… Pero, sobre todo, anhelos.
Ficha técnica e artística
INTERPRETACIÓN: Nacho Castaño, María Costas, María de las Llanderas e Fran Nogueira
DIRECCIÓN: Nerea Brey
TEXTO: Ernesto Is
ESPAZO E ILUMINACIÓN: Beatriz de Vega
VESTIARIO: Javier Lojo
ESPAZO SONORO: Nerea Brey e Ernesto Is
