O alumnado do Obradoiro Dual de Emprego Monte Noso, impulsado polo Concello de Rianxo, vén de finalizar a súa formación en materia de prevención de riscos laborais. O alcalde Julián Bustelo fixo entrega dos diplomas acreditativos ás persoas participantes no obradoiro, á vez que as animou a “continuar traballando” e “formándose dan man do equipo docente que participa no obradoiro”, para cuxo desenvolvemento o Concello de Rianxo recibiu unha achega económica de 398.284,65€ da Consellería de Promoción do Emprego e Igualdade.
O Obradoiro Dual de Emprego Monte Noso vai destinado a 15 alumnos/as-traballadores/as, con contratos de formación dunha duración de 12 meses e o seu correspondente profesorado. Céntrase nas repoboacións forestais e tratamentos silvícolas e en actividades auxiliares en conservación e mellora de montes.
Os traballos do obradoiro abranguen as actividades necesarias para o establecemento de plantas arbóreas do tipo de frondosas autóctonas, reposición de plantas danadas ou mortas, rozas manuais e mecanizada, rareo de arborado, podas, corta de invasoras, control de pragas e enfermidades, tratamentos fitocidas, mantemento de vías forestais (limpeza de gabias…), entre outros.
