Este venres 8 de marzo, Día Internacional das Mulleres, a nosa comarca vai ser un fervedoiro de accións e mobilizacións reivindicativas. En Ribeira, ademais das actividades impulsadas polo Concello e o CIM local, terá protagonismo a concentración convocada pola plataforma Mulleres en Acción (Asociación de Mulleres do Barbanza), co obxectivo de seguir avanzando en cuestión de igualdade e dereito e, tamén, “polo remate da xustiza patriarcal”. Será este venres ás 20.00 horas na porta do Sol de Ribeira. A asociación adianta que en caso de choiva a concentración trasladarase aos soportais do edificio da “Caixa de Aforros”, na rúa de Galicia, a partir da mesma hora.
