A Mancomunidade Barbanza Arousa patrocina por terceiro ano a proba ciclista III Challenge Volta o Barbanza A Orixe que organiza o Club Ciclista Barbanza e que se celebra os días 23 e 24 de marzo en dúas etapas que percorrerán os catro municipios da vertente sur do Barbanza (Ribeira, A Pobra do Caramiñal, Boiro e Rianxo).
Na presentación da proba, desenvolvida na tarde deste 18 de marzo, participaron o presidente da mancomunidade e alcalde de Ribeira, Luis Pérez Barral; o concelleiro de deportes da Pobra do Caramiñal, Eloy Sobrido; o concelleiro de Deportes do Concello de Boiro, Marcos Fajardo; o alcalde de Rianxo, Julián Bustelo; a xerente da Mancomunidade, Fátima Cachafeiro, e os membros da directiva do Club Ciclista Barbanza, José Ramón Torrado e Ricardo Riveiro; e o presidente da Federación Galega de Ciclismo.
Segundo fixeron saber, na proba van participar máis de 100 corredores de 20 clubs de toda a xeografía española e tamén portugueses. Dende a Federación Galega de Ciclismo, agradeceron a implicación da Mancomunidade e do Clube para levar a cabo este importante evento deportivo.
Por parte do club agradeceron o apoio da Mancomunidade Barbanza Arousa para “poder levar a cabo unha proba como esta que acolle a corredores de todo o territorio e que se realiza en todos os municipios”.
A cita deportiva artellarase en dúas etapas, a primeira o sábado 23 de marzo con saída e chegada en Boiro e que discorre tamén por Rianxo. A segunda etapa será o domingo día 24 e con saída e chegada na Pobra do Caramiñal e que transcorrerá tamén por Ribeira.
“Estamos ante un evento que da a coñecer a paisaxe e recursos do territorio, atraendo público fóra da época estival, axudándonos así a desestacionalizar a demanda. Realízase nos catro concellos, en dous cada ano, co obxecto de mostrar todo o destino turístico de forma cohesionada e reforzando a identidade corporativa”, manifestou Fátima Cachafeiro, xerente da Mancomunidade.
Pola súa banda, o presidente de Barbanza Arousa e alcalde de Ribeira, Luis Pérez Barral, destacou que esta proba segue a estratexia da Mancomunidade de potenciación turística mediante actividades que poñen en valor a paisaxe, a natureza e a cultura. “Búscase ademais que tanto os participantes coma os seus acompañantes coñezan o territorio, volvan noutros momentos de forma vacacional e sexan prescriptores de Barbanza Arousa entre a familia e amigos”, sinalou, aproveitando tamén a rolda de prensa para convidar a veciños, veciñas e visitantes a achegarse a desfrutar da proba.
