Segundo informaron ao 112 Galicia os profesionais de Urxencias Sanitarias de Galicia-061, tres persoas tiveron que ser trasladadas esta mañá despois de producirse unha colisión entre cinco vehículo na AG-11, no quilómetro aproximado 21, ao seu paso pola parroquia de Cespón, no municipio de Boiro.
A información recolleuse no 112 Galicia a través de diversas persoas que contactaron co centro de emerxencias ás 07:35 horas. Un deles foi un particular implicado que informaba que batera con algo na estrada, non sabía especificar o que, e debido a isto varios vehículos colisionaron con el. Tamén comunicaba que non podía confirmar se nos outros vehículos había persoas feridas ou atrapadas.
Deseguido, os xestores do 112 Galicia puxeron os feitos en coñecemento dos profesionais de Urxencias Sanitarias de Galicia-061, dos Bombeiros de Boiro, dos axentes da Garda Civil e dos membros de Protección Civil de Boiro.
Unha vez no lugar, os equipos de intervención confirman ao 112 Galicia que tres persoas tiveron que ser trasladadas, aínda que o seu estado non revestía gravidade, e que finalmente foron cinco os vehículos implicados no accidente, os cales entorpecían a circulación xa que estaban ocupando ambos carrís da autovía.
