A deputada de igualdade e normalización lingüística, a outense Soledad Agra, visitou este luns 16 de xaneiro a Casa de Rosalía en Padrón, onde foi recibida polo presidente da Fundación Rosalía de Castro, Anxo Angueira (Manselle, Dodro, 1961) e onde coñeceu diferentes proxectos se están a desenvolver dende a entidade cultural que leva o nome da ilustre poeta galega. Ademais, comentaron outras posíbeis vías de colaboración entre ambas as dúas institucións, que se sumen ás que xa están en marcha.
“A Casa de Rosalía é a casa de todos os galegos e galegas: un lugar onde viaxar ata as nosas raíces, pero tamén onde recoñecernos na actualidade e onde mirar cara un futuro con identidade propia” apuntou a deputada. “Sempre é unha honra poder coñecer un chisco máis da vida e do traballo de Rosalía”.
Esta visita serviu para abordar a mostra dos 50 anos da Casa de Rosalía e tamén a do ‘Herbario de Rosalía’, entre moitas outras iniciativas, e tamén para “seguir nesta senda de colaboración cunha entidade que fai un labor excepcional de difusión da figura de Rosalía, pero tamén da lingua e da cultura do país”.
