A manchea de pélets de plástico que a Xunta prognosticou que esta fin de semana invadiría as praias de Galicia non se cumpriu: o vento destes días desprazou esa marea plástica ou marea branca cara ao centro do Atlántico, afastándoa da comunidade galega.
Así o informa o grupo canario de investigación OpenPLAS para o que a maior parte dos granulados seguen en océano aberto e non nas proximidades da costa galega. Os plásticos foron levados polas correntes mariñas ata Asturias e Cantabria en cantidades mínimas respecto das “traídas” á costa de Galicia.
Nada se pode asegurar sobre as condicións nas que se atopan os sacos que seguen no Atlántico, mais semella que a maioría non chegaron á costa.
Os pélets volverán, pero en pequenas manchas nas vindeiras semanas e meses. Probablemente, di OpenPLAS, con maior incidencia nas Rías Baixas que noutros puntos do territorio costeiro de Galicia.
Máis sendo isto importante, non o é menos a pretensión de cambiar a lexislación europea para o transporte deste material, obxectivo que centra actualmente -xunto coa decisión de seguir a recoller as boliñas de plástico que aínda están nas praias- a atención das organizacións medioambientalistas na vía de reconsiderar os pélets produtos perigosos e moi contamiñantes; modificar a normativa de transportes marítimos para que os pélets se transporten con maior seguridade e sexan manexados por profesionais especializados, e esixir responsabilidades, con multas ás empresas implicadas, produtoras e de transportes; así como establecer un protocolo de actuación en caso de desastre medioambiental a nivel estatal para actuar axiña.
Son peticións dirixidas aos políticos, cos que os medioambientalistas tentan reunirse, xunto cos representantes autonómicos e estatais, para acadar este cambio.
As bólas atopadas ata o de agora, teñen relación coa empresa polaca Bedeko Europe, produtora e distribuidora deste tipo de material, que fai recaer na navieira danesa Maerks a responsabilidade do vertido, se ben adxudica a propiedade dos sacos a una empresa india, como xa informara O Barbanza.
Un contedor de pélets pode levar no seu interior ata 25 toneladas, o que equivale a entre 800 e 1.000 sacos de pélets: máis de mil millóns destas bólas que, voluntarios e traballadores de empresas contratados ao efecto, seguen a recoller.
Como se lembrará o buque Toconao perdeu parte da súa carga o 8 de decembro á altura de Viana do Castelo (Portugal). Un destes colectores perdidos cargaba bolsas de granulados plásticos. En total, 1.050 sacos de pélets. Estes, polo seu reducido tamaño, non é doado recollelos unha vez que están esparexidos nos areais. Son considerados “esponxas tóxicas” que atraen toxinas químicas e outros contaminantes ás súas superficies. A limpeza -de non contribuír decisivamente o mar e o vento- pode levar meses, mesmo anos, porque non se biodegradan, fragméntanse en nanopartìculas que poden chegar a ser inxeridas polo plancto (base de toda a cadea alimentaria mariña).
