Ao longo destas xornadas de mediados de xaneiro o Concello de Porto do Son mobilizou tamén recursos para limpar os areais de residuos plásticos e doutra índole, facendo especial fincapé na vixilancia na chegada de granulados procedentes do buque Toconao. Os traballadores mobilizados polo Concello achegáronse esta fin de semana ás praias Cabeiro, a Arnela, Seiras, Río Sieira, As Furnas, Basoñas e Espiñerido.
Segundo informaron, os areais “estaban limpos” e, engadiron, “practicamente non se aprecian granulados nin residuos nelas”. Con todo, recolleron os refugallos que se aprecian nas imaxes, algúns xa apañados polo voluntariado e dispostos para a súa retirada.
Dende o Concello engadiron que “somos conscientes de como traballa o mar e, polo tanto, estaremos vixiantes do que aconteza nos vindeiros días e semanas; seguiremos protexendo os nosos espazos naturais de toda contaminación para devolver ás nosas praias e ao noso paraíso o estado óptimo que sempre debería ter”. O Concello tamén agradeceu o labor de todas as persoas que botan unha man coidando, limpando e protexendo o patrimonio natural de Porto do Son.
