O alcalde de Boiro, José Ramón Romero, emitiu unhas declaracións con motivo da visita ao concello do conselleiro do Mar, Alfonso Villares, que estivo en Boiro este mércores 3 de xaneiro. Nas súas declaracións o rexedor láiase de que a Xunta “non faga fronte aos problemas do sector mar-industria, un sector estratéxico e fundamental para a nosa comarca e que está a pasar o seu peor momento”. Tamén criticou que o conselleiro non tivera oportunidade nin de avisar ao alcalde nin de reunirse co sector. E engadiu: “Non nos sorprende esta actitude por parte da Xunta de Galicia, pois parece que sempre se esquecen de avisar á Administración local cada vez que realizan unha visita institucional. O que si nos sorprende é que durante a visita non tivesen oportunidade de visitar aquelas entidades do sector primario como confrarías ou entidades mexilloeiras e que están a demandar solucións”.
O rexedor comentou que “a falta de man de obra cualificada e a problemática do relevo xeracional, a escaseza de produción ou o descenso do consumo son os principais problemas aos que hai que facer fronte nos vindeiros anos”. E apuntou: “Fronte a iso vemos como a Xunta de Galicia lle segue a dar as costas aos problemas do sector e se dedica a ‘poñer en valor’ a unha cadea produtiva que está a deixar morrer”.
José Ramón Romero emprazou ao conselleiro a “que atenda as necesidades do sector”. Segundo fixos saber, “a cadea mar-industria é fundamental para a nosa comarca pois supón o 76% da nosa riqueza e todos os pasos da cadea son fundamentais, pero se nos falta a materia prima non temos nada que facer”.
E rematou: “A Xunta de Galicia, a que ten as competencias, é a que debe poñer sobre a mesa solucións para reverter esta situación. Afrontar os problemas actuais polos que está a pasar o sector é a única maneira de poñelo de verdade en valor”.
