Tralo debate no pleno da Eurocámara sobre a contaminación na costa galega causada polo vertido de granulados plásticos, celebrado este xoves a petición do BNG, a eurodeputada do Bloque volveu facer un percorrido por diversos areais no que se está levando a cabo a recollida destes microplásticos. “É unha mágoa que as mariscadoras estean limpando as praias en lugar de mariscar”, denunciou Miranda durante un encontro que mantivo cun colectivo de mariscadoras.
Tamén engadiu que “o problema é que temos un Goberno do PP ausente, máis preocupado por manipular a realidade e facer oposición á oposición que en ter a costa limpa e sen vertidos. É un problema ter un goberno negacionista”, manifestou a eurodeputada do Bloque, quen visitou as praias de Muros xunto á alcaldesa desta localidade, María Lago, a eurodeputada irlandesa Grace O’Sullivan e Primitivo Pedrosa, mariñeiro do BNG de Muros, e onde se reuniu coa vicepresidenta de ADEGA, Verónica Torrijos.
Para Ana Miranda “é insultante” que o Partido Popular, no Goberno da Xunta nos últimos 14 anos, “non se preocupe pola situación do sector marisqueiro, o incompleto saneamento das rías ou pola afectación do cambio climático á temperatura das augas –que afecta tremendamente á actividade extractiva- e polo uso de fondos europeos no caso de paralización temporal da actividade”. Lembra que o Executivo autonómico “deixou sen executar, como xa vén sendo habitual, unha gran cantidade dos fondos europeos dos que dispón”.
E engadiu: “En lugar de facer un bo uso destes fondos, déixaos sen executar, impedindo o acceso a colectivos que o precisan, como o sector do marisqueo, mentres que no último mes tratan de gastar os cartos en campañas de marketing e publicidade puramente electoralistas que non teñen ningún sentido”, critica.
