No día deste mércores 24 de xaneiro celebrouse no salón 2 dos edificios administrativos de San Caetano en Santiago de Compostela unha reunión de traballo convocada pola Dirección Xeral de Comercio na que participou a patronal boirense (a ABE) representada polo seu xerente, Tomás Estévez.
A reunión, unha sesión de traballo de carácter técnico, foi coordinada polo director xeral de Comercio, Manuel Heredia, e a ela tamén asistiu á conselleira de Economía, Industria e Innovación, María Jesús Lorenzana que acompañou aos 51 xerentes dos centros comerciais abertos que actualmente están activos en Galicia.
No seu transcurso coñecéronse as liñas de axuda para o sector que se van a publicar durante este ano 2024 vinculadas ao plan estratéxico para o sector da Xunta de Galicia e confirmouse que ademais de manterse as publicadas no pasado ano introdúcense novos investimentos subvencionábeis coma os de reformas dos establecementos comerciais.
No referente ás axudas para as entidades, a reunión serviu para matizar diferentes aspectos e posíbeis melloras de cara a orde deste ano que, como comenta o xerente da ABE, Tomás Estévez, “inciden en 3 aspectos principais; a dixitalización, a promoción comercial e a fidelización de clientes, aspecto este último no que a ABE está na vangarda do país cun sistema propio que conta actualmente con 2.696 usuarios activos e 34.428 compras rexistradas”.
A xuntanza tamén serviu para poñer en valor as cifras actuais do sector do pequeno comercio en Galicia que como apuntou o xerente da ABE “actualmente e segundo os datos do INE en Galicia contamos con preto de 40.000 comercios o que supón o 22% de todas as empresas da comunidade”.
Esta reunión de traballo tamén foi unha oportunidade para mellorar a coordinación entre a administración e as asociacións que son as encargadas finais de informar e asesorar aos negocios sobres as axudas vixentes. No caso da ABE aínda “imos máis aló”, comentou o xerente, engadindo que “somos unha das poucas asociacións do país que realiza a xestión integral dos expedientes de axudas dende a información inicial ata a solicitude e xustificación e este coñecemento dos procedementos é o que a xunta valora neste tipo de xuntanzas para introducir melloras nas ordes como a de subvencionar reformas nos comercios”.
