A Xunta de Galicia prometera reducir os tempos de espera para que calquera persoa que solicite a valoración da súa discapacidade poida ter dereito aos beneficios que esta gradación supón.
A realidade actual é máis ben diferente. Queríase pasar do ano e medio de demora na valoración, aos doce meses e na actualidade aos seis meses, pero hai moitas persoas que levan máis dun ano e medio pendentes de ser valoradas, cos consecuentes prexuízos que isto supón, tanto para elas como para os seus familiares ou os coidadores. Isto tamén rompe o principio de Igualdade, ao que tanto apelan o actuais gobernante da Xunta de Galicia.
O Equipo de Valoración e Cualificación de Discapacidades da Xunta de Galicia está a incumprir os prazos prometidos e está a levar a que, persoas con certo grao de discapacidade, non poidan acollerse aos beneficios que iso supón: a axuda dunha terceira persoa, a axuda no fogar, o poder acudir a un centro de día, o poder ingresar nun xeriátrico, as deducións ou exencións de taxas municipais ou impostos, a tarxeta de estacionamento en zonas adecuadas para discapacitados, a utilización do transporte público gratuíto, etc.
