O espírito do Nadal resistindo o Grinch, unha paisaxe nevada e decoración propia desta época elaborada con produtos do mar son as tres propostas creativas gañadoras do concurso de escaparates impulsado pola Concellaría da Promoción Económica da Pobra do Caramiñal no seo da campaña Consegue Caramiñas, Comparte Nadal.
O xurado decidiu que os galardóns recaesen, polo tanto, en Pizpireta Mercería, Sport Maniotas e Pescados e Mariscos Moncha: un primeiro premio consistente na realización de 6 escaparates profesionais durante un ano a cargo dunha técnica de mercadotecnia visual; un segundo, dotado de 4; e un terceiro, con 2.
A concelleira da Promoción Económica, Amparo Cerecedo, xunto coa técnica de mercadotecnia Cany Juncal, foi a encargada de facer a entrega das distincións.
A edil agradeceu a participación dos quince establecementos que participaron nun certame que buscaba a implicación dos negocios da localidade para incrementar o carácter vistoso dos espazos públicos nestas datas; unha inventiva que tamén se fixo notar nas arredor de 200 árbores e a vintena de grilandas que repartiu a Administración local para que o sector comercial e hostaleiro ornamentase ao seu gusto.
