O Concello da Pobra engadiu unha nova actividade de dinamización cultural e económica á campaña pobrense Consegue Caramiñas, Comparte Nadal. A concelleira da Promoción Económica, Amparo Cerecedo, explicou que, se días atrás se presentaba a cuarta edición do concurso de embelecemento de domicilios, neste ano apóstase tamén por un certame de escaparatismo destinado aos negocios da localidade.
En palabras da edil, esta iniciativa busca “a implicación do comercio e establecementos da localidade, así como do sector hostaleiro, para incrementar o engalamento das vías públicas nesta época festiva”.
Para contribuír a acadar tal fin e incentivar a participación, o Concello tamén fixo entrega de arredor de 200 árbores con vistas á súa colocación á entrada dos establecementos e unha vintena de grilandas para aqueles a pé de beirarrúas estreitas co obxectivo de que os decoren ao seu gusto. Cerecedo indicou ademais que no 5 de novembro desenvolveuse un obradoiro vermú de decoración e atrezo que contou coa participación de máis de vinte representantes dos sectores da hostalaría e do comercio.
Establécense tres premios: un primeiro consistente na realización de 6 escaparates profesionais durante un ano a cargo dunha técnica de mercadotecnia (marketing) visual; un segundo dotado de 4; e un terceiro con 2.
Para tomar parte desta actividade, deberán cubrir o formulario en liña específico habilitado polo Concello entre os días 1 e 8 de decembro. Logo de ornamentados os escaparates, deberanse remitir dúas fotografías ao enderezo electrónico promocioneconomicapobra@gmail.com antes do día 11. A decoración deberá permanecer ata o día 1 de xaneiro, data inclusive.
As bases completas están dispoñibles na web municipal, www.apobra.gal.
