O compromiso do Concello da Pobra do Caramiñal co benestar animal deu nesta recta final de ano un paso adiante co acondicionamento das instalacións do centro de recollida. O alcalde e titular da Concellaría do Benestar Animal, José Carlos Vidal, explicou que “remataron xa os traballos de mellora da zona de esparexemento”. En termos máis concretos, efectuouse a pavimentación do patio exterior do recinto, a construción dun muro de contención e a mellora na canalización de pluviais para a eliminación de filtracións no inmóbel.
O investimento situouse preto dos 25 000 euros, IVE incluído, a cargo do remanente da Tesouraría, e a obra foi executada por Excavaciones Nima.
Con relación a esta intervención, o mandatario local manifestou que “este Goberno séntese orgulloso deste tipo de accións; de lles dar unha oportunidade aos animais que foron apartados a un lado, abandonados ou maltratados, polo cal, mentres non sexan adoptados e estean baixo a custodia do Concello, sempre terán unhas condicións de vida dignas”.
Tamén agradeceu o “encomiábel labor que realiza a Protectora Moura a prol do benestar animal”. Actualmente hai nove cans á espera dunha familia no dito centro. As persoas interesadas en adoptar pódense pór en contacto a través do teléfono 604030396 ou do enderezo electrónico protectoramoura@gmail.com.
