O alcalde de Ribeira, Luís Pérez Barral, e a concelleira de Cultura, Antía Alberte, visitaron a sede do obradoiro de Frouma Atlantic Wood, a empresa do ribeirense Fran Millán, gañador do Premio Artesanía de Galicia 2023.
Como lembraremos, o artesán gañou o concurso autonómico, convocado pola Xunta, coa peza Noray, un pequeno móbel auxiliar elaborado con madeira de batea. O carpinteiro, que traballa tódalas súas pezas con madeira de batea, estableceuse en Ribeira fai un ano.
O alcalde felicitou a Fran Millán e agradeceu que o artesán escollese a súa terra para establecer o seu proxecto económico. “É un orgullo para Ribeira ter artesáns deste calibre e debemos apostar por este tipo de produtos únicos”.
