A conselleira de Medio Ambiente, Territorio e Vivenda, Ángeles Vázquez, mantivo unha xuntanza co alcalde de Noia, Santiago Freire, para analizar vías de colaboración en materia de vivenda. Durante o encontro, o rexedor trasladoulle a necesidade de ampliar o parque de vivendas protexidas da localidade, ao que a vicepresidenta segunda propuxo varias alternativas. Por exemplo, dado o feito de ter Noia menos de 20.000 habitantes, o Concello podería optar a unha nova convocatoria das axudas para a rehabilitación de edificacións e vivendas de titularidade municipal. Nese caso, as axudas poderán acadar ata o 95% do orzamento protexido das obras, sen que en ningún caso poidan superar a cantidade de 50.000 euros por vivenda rehabilitada.
A conselleira tamén debullou a posibilidade de que, no caso de dispor ou adquirir algún inmóbel susceptíbel de destinarse a uso residencial, podería obter financiamento ao abeiro do fondo de cooperación para o apoio ao financiamento de actuacións de rehabilitación e conservación do patrimonio construído en concellos de menos de 50.000 habitantes.
E, a maiores, tamén podería optar ao programa de construción de vivendas para alugueiro social en edificios enerxeticamente eficientes.
