No período democrático, na cidade centenaria, todos os rexedores municipais xestionaron o patrimonio, os orzamentos municipais e a vida pública da mellor maneira que sabían, segundo as súas propias ideas políticas ou tendo en consideración as demandas veciñais.
Os alcaldes, Pérez Queiruga, Lisardo Valeiras, Ventoso Mariño, Torres Colomer, Manolo Ruiz e, actualmente, Luís Pérez, demostraron a súa particular forma de entender a política municipal en Ribeira. Todos eles tiveron a súa importancia no crecemento da cidade, desde as dotacións orzamentarias en pequenas obras de infraestruturas ata os grandes investimentos, aproveitando os fondos da Unión Europea. A colaboración entre administracións, estiveron presentes, en todo o longo período democrático, desde a Xunta de Galicia como a propia Deputación Provincial.
A política municipal é a máis próxima ao cidadán, a dos problemas cotiáns e diarios. A iluminación pública, os camiños públicos, o saneamento, a regulación do tráfico, a recollida de lixos, a educación, a cultura, os polígonos industriais, o comercio local, a promoción do emprego, a vivenda …, é dicir unha infinidade de situacións e de actuacións moi necesarias para garantir a calidade de vida de todos os veciños.
Por outra banda, tamén é xusto recoñecer que calquera alcalde, sen o equipo de goberno e a propia corporación municipal, non sería capaz de desenvolver os seus proxectos e investimentos. Un pobo e unha cidade vive e medra grazas á boa xestión do seu gobernante e ao compromiso dos seus veciños.
