A convocatoria terá lugar este xoves 14 ás seis da tarde diante do centro de saúde en Lestrobe.
Esta é unha proposta unitaria sen ningún tipo de siglas, na que a Unidade Veciñal de Dodro solo convoca a mesma e que foi remitida a todos os grupos políticos de Dodro e os distintos axentes sociais ante a grave situación no que se atopa o centro médico de Lestrobe no que soamente atende un solo médico a toda a poboación de Dodro polo traslado da outra médica e que non se cubre o seu posto dende a Xunta de Galicia.
Animan a toda a veciñanza a que acuda a esta concentración indistintamente de cal sexa a súa filiación política porque a mobilización ten que ser de todos para facer mais visible o problema.
Están a favor das distintas mobilizacións que poidan realizar distintas formacións políticas de forma individual e animan tamén á veciñanza a apoiar estas convocatorias.
No transcurso da concentración lerase un “Manifesto pola Atención Primaria Sanitaria no Rural” que encabeza o seguinte texto: “Nós, os veciños de Dodro, reunímonos hoxe para expresar a nosa firme convicción na importancia vital da atención primaria sanitaria nas zonas rurais.
Recoñecemos que a saúde é un dereito fundamental de cada individuo, independentemente da súa localización xeográfica, e afirmamos a necesidade de garantir un acceso equitativo e de calidade aos servizos de saúde para todos os habitantes das nosas comunidades rurais.”
