Dodro tamén centrará a axenda de Nadal na rapazada, achegando actividades culturais, creativas e de lecer para este tempo de vacacións. Entre as actividades máis destacadas figura a programada para o día 22: a festa familiar dos Monstruíños de cores, a partir das 17.00 no Pavillón Municipal. Haberá, en palabras do Concello, “diversión, música, inchábeis e boa compañía”. Trátase dun dos espectáculos da Rede Cultural da Deputación que forma parte da programación de Nadal.
A maiores, o vindeiro día 27 A Xanela do Maxín trae a Dodro un contacontos con monicreques baixo o título de O Apalpador e a nena sen medo inspirado no libro de Celtia Figueiras. Trátase dun espectáculo familiar para a rapazada (a partir de tres anos) que nos conta a historia do Apalpador e a súa xenerosa teima de traer agasallos e castañas dende os montes de Courel, polo tempo de Nadal. Por iso a nena sen medo lle escribiu unha carta moi especial, pedíndolle o que a ela lle faltaba, o seu desexo: palabras en galego para encher o corazón e coas que poder voar en soños.
A cita ás seis da tarde na Casa da Cultura de Dodro
O espectáculo tamén se encadra n a Rede Cultural da Deputación da Coruña.
O día 5 de xaneiro, o concello recibirá a visita das Súas Maxestades Os Reis Magos de Oriente, co Pavillón de Deportes como punto de encontro. Haberá animación musical, agasallos e lambetadas.
Ademais, en xaneiro iníciase o segundo semestre das Escolas Deportivas Municipais, organizadas pola área municipal de Deportes e coa colaboración da Deputación. O inicio está previsto para o 8 de xaneiro. Para nenas e nenos ofrécense as seguintes actividades: psicomotricidade, multideporte, patinaxe e baile deportivo. Para maiores de 15 anos, ximnasia de mantemento, pilates, zumba, adestramento funcional – crossf. Para as persoas maiores de 65 anos e persoas con mobilidade reducida as actividades programadas son psicomotricidade e tonificación. As actividades levaranse a cabo no Pavillón Municipal. Máis información a través do 981802532 e deportes@dodro.gal.
