Volve o Concurso de Tapas de Outes, logo do éxito (de participación e repercusión) da primeira edición, na que, como lembraremos, a consumición mellor valorada resultou ser a Tapa do Pumar, do Restaurante Fera, en Cando. Agora o Concello de Outes vén de compartir o cartel da segunda convocatoria, onde se amosan as datas (dúas quendas en novembro) e os locais participantes (unha decena).
Respecto das datas, celebrarase os días 17, 18, 19, 24, 25 e 26 de novembro. No que atinxe aos locais participantes serán os seguintes: Pepe do Coxo, Asador Albatros, A de Vila e O Taboleiro (O Freixo); John Turkey e Casa Amanda (Serra de Outes); Restaurante Fera (Cando); Bar Chouto (Valadares); Hostal Viña (Cruceiro de Roo); e A Nosa Taberna (Santo Ourente).
Quen participe entrará no sorteo dunha cea para dúas persoas valorada en 150 euros.
Primeira edición
O I Concurso de Tapas en Outes celebrou a súa máis recente edición entre o 3 e o 11 do pasado mes decembro, acadando unha grande aceptación entre os veciños e visitantes. A nota predominante foi a calidade das tapas que cada local puxo en concurso e a alta participación. Os datos resultantes, despois do reconto, din que foron case 2.600 tapas servidas e cunha valoración moi alta de todas elas por parte dos participantes.
