O Concello de Rianxo compartiu o programa de actividades organizado pola Concellería de Política Social co gallo do #25N, Día Internacional para a Eliminación da Violencia contra as Mulleres. A axenda, desenvolvida en colaboración co CIM (Centro de Información á Muller) de Boiro, inclúe obradoiros, espectáculos teatrais e exposicións e reivindicativas a desenvolver durante as vindeiras semanas en diferentes emprazamentos do termo municipal rianxeiro.
O programa comeza este martes 14 de novembro cun obradoiro práctico sobre convenios reguladores, de 19.00 a 21.00 horas no salón de actos do Auditorio Municipal. As actividades proseguirán o 18 de novembro cun obradoiro de defensa persoal feminina, no Pavillón Municipal de Taragoña, en horario de 10.00 a 14.00 horas.
Ademais, o martes 22 e o mércores 22 de novembro celebraranse charlas sobre ciberacoso para as alumnas e alumnos de 5º e 6º de Primaria e de 1º da ESO dos centros educativos rianxeiros.
O martes 24 de novembro, en horario de 19.00 a 21.00 horas, presentarase no salón de actos do Auditorio de Rianxo, o Glosario Violeta.
O 25 de novembro chegará un dos actos máis relevantes do programa: o acto institucional do Día para a Eliminación das Violencias contra as Mulleres. Representarase a peza teatral As paisaxes de Camille (a cargo da organización inclusiva da nosa comarca AMBAR) e inugurarase a exposición do tapiz de Ondiñas Mainas contra as agresións. Será ás 19.30 horas na Sala Arcos Moldes do Auditorio Municipal.
Ademais, haberá obradoiros de bailoterapia (Fogar das Mulleres) os xoves de novembro de 18.00 a 18.45 horas, no Centro Social da Capela (Araño); e o martes 28 de novembro pola tarde (de 18.00 a 20.00 horas), na Escola de Buhía (Araño) celebrarase o obradoiro creativo Bravas coma Medusas, descentes de Medusa, adicado ás vítimas de violencia sexual na nenez.
