Este mércores 15 de novemro presentouse a II edición do certame gastronómico En Outes de Tapas. Na cita participaron o alcalde, Manolo González, e máis a concelleira de Turismo, Soledad Agra, quen destacaron “o éxito acadado na edición anterior” e “a boa acollida que tivo por parte do público e a importancia que ten para dar a coñecer a gastronomía de Outes e aos distintos establecementos que participan”.
Segundo engadiron, este ano serán dez establecementos os que propoñen un percorrido por distintas parroquias do concello coa intención de “sorprender aos visitantes coas elaboracións previstas”. Será, sinalaron, “unha nova aposta pola cociña tradicional con produto local pero ao mesmo tempo innovadora e chea de creatividade”. Os establecementos participantes son:
No Freixo: O Taboleiro, Pepe do Coxo, Asador Albatros e A de Vila.
No Cruceiro de Roo: Hostal Viña
Na Serra de Outes: Casa Amanda e John Turkey
En Santo Ourente: A Nosa Taberna
En Cando: Restaurante Fera
En Valadares: O Chouto.
Nesta edición o gañador terá que pasar unha dobre valoración xa que ademais do veredicto do público teremos un xurado profesional que fará a sua valoración en base a creatividade, innovación, sabor e uso de produto local. Ao igual que o ano pasado as tapas teñen un valor de 2 € e sortearase unha cea para dúas persoas valorada en 150 € nun dos locais participantes. As datas do Concurso son os días 17, 18, 19 e 24, 25 26 de Novembro “o cal”, sinalaron González e Agra, “axuda a desestacionalizar as visitas ao concello e a promocionar o produto de tempada”.
