O alcalde de Ribeira e a concelleira de cultura, Antía Alberte, presentaron este martes 7 de novembro, xunto a Xoan Hermida (Asociación Memoria Histórica do Barbanza), o acto institucional que acompañará, este venres ás 20.00 horas, a escultura de Soledad Penalta que se atopa no porto de Ribeira e que rende homenaxe ás persoas que foron asasinadas ou represaliadas polo fascismo na Guerra Civil.
A inauguración, por certo, coincide co aniversario do fusilamento do escritor e xornalista ribeirense Manuel Lustres Rivas.
No evento participarán Xosé Antonio Pérez Fernández, historiador e membro de Memoria Histórica do Barbanza, María Dolores Sanlés Sieira e Celia García Pillado, familiares de represaliados, Soledad Penalta, escultora, e Luís Pérez Barral, alcalde de Ribeira.
“Queremos homenaxear a tódalas persoas que sufriron represalias durante o franquismo no noso concello e que deron a súa vida pola liberdade de polos valores democráticos” explicou o alcalde Luís Pérez Barral. “Dende as institucións e dende o eido local temos que colaborar para que esas persoas que deron a súa vida pola liberdade teñan un recoñecemento público”, engadiu.
