O concelleiro de Turismo, Francisco Suárez-Puerta e a concelleira de Comercio, Veva Betanzos; presentaron este mércores 29 de novembro os detalles do concurso de decoración para comercios e locais hostaleiros. Segundo fixeron saber, o certame está aberto a negocios de todo o concello, e haberá 3 premios para cada modalidade; un primeiro premio cunha cesta valorada en 300 euros, un segundo premio cunha cesta valorada en 200 euros e un terceiro premio que constará dun bono de 150 euros para gastar no comercio local.
O concelleiro Suárez-Puerta explicou que “o propósito do concurso é a dinamización do comercio e tecido económico do Concello durante as festas e conseguir un Nadal máis vistoso entre todos”. O xurado que valorará a decoración dos comercios estará formado por representantes da hostalaría; e o xurado que valorará a decoración dos negocios estará formado por representantes dos locais comerciais.
Asemade, o edil anunciou que tamén se levará a cabo un concurso en tódalas parroquias de decoración de fachadas para tódolos fogares que desexen participar, cuxas bases anunciaranse en datas vindeiras.
