Barbanza acollerá o vindeiro 18 de novembro unha nova edición do Rally Ribeira Ría de Arousa que se celebra durante a fin de semana en Ribeira, A Pobra do Caramiñal, Boiro, Rianxo, Lousame e Porto do Son. En Boiro os vehículos competirán o sábado 18 de novembro e discorrerán polos núcleos de Runs, Mosquete, Cubelo e Cadarnoxo. En canto ás medidas de tráfico e seguridade para o desenvolvemento da proba, non se poderá estacionar na avenida da Constitución o sábado dende as 14.00 e as 20.00 horas para o reagrupamento de vehículos, entre o cruce da avenida da Avellaneda e o cruce da avenida de Barraña.
Para o desenvolvemento da proba na zona do tramo tamén se van producir cortes de tráfico entre as 11.00 e as 22.30 horas polo que se verá afectada a aldea de Runs, que terán que realizar os accesos con vehículo mediante o cruce de Coroño.
A proba pasa preto do núcleo de Mosquete, polo que os veciños e veciñas da aldea terán que servirse pola parroquia de Lampón. Estará afectada tamén a aldea de Cubelo e a de Cadarnoxo, que se terá que servir pola zona de Cures. Todos os veciños e veciñas afectados serán informados das alternativas de desprazamentos por seguridade durante o desenvolvemento da proba.
