A concelleira da Igualdade, Estefanía Ramos, presidiu neste 14 de novembro a cuarta sesión da Mesa Local de Coordinación Interinstitucional contra a Violencia de Xénero, á que tamén asistiu a xefa da Unidade contra a Violencia sobre a Muller da Subdelegación do Goberno na Coruña, a Garda Civil, a Policía local, representantes dos centros educativos e técnicas municipais dos Departamentos da Igualdade e dos Servizos Sociais.
Alí coñeceron polo miúdo as actividades artelladas co gallo do Día Internacional da Eliminación da Violencia Contra a Muller, que se conmemora no 25 de novembro.
Tamén se puxo sobre a mesa a preocupación sobre como emprega o alumnado as redes sociais e o contido que visualizan. Deste xeito, establecéronse estratexias de intervención que permitan reducir un risco indebido dos dispositivos.
Os datos da Garda Civil reflicten que actualmente hai 25 casos activos de violencia machista, nos que as vítimas interpuxeron unha denuncia. Constátase un incremento con relación ao ano pasado. Os corpos de seguridade fan seguimento dos mesmos a través do sistema VioGén: á Policía local correspóndenlle aqueles casos cun nivel de risco baixo ou non apreciado, mentres que a Garda Civil asume os de maior risco. Pola súa parte, dende comezos do presente ano, a Área da Igualdade prestou servizo a un total de 23 mulleres que sofren esta realidade.
No que respecta aos festexos do Carme dos Pincheiros e do Nazareno non se detectaron incidencias e en ámbalas celebracións se habilitou Punto Violeta.
A dita mesa eríxese como un mecanismo a través do cal analizar situacións de violencia machista e actuacións para a detección precoz desta lacra social coa finalidade de deseñar entre tódolas/os axentes implicados liñas estratéxicas para loitar contra a mesma, así como sensibilizar á veciñanza.
