Concello de Boiro celebrou este xoves día 23 ás 20.00 horas a sesión plenaria ordinaria correspondente ao mes de novembro. O pleno contou coa ausencia de Roberto Lojo, concelleiro do PSdeG. Acudiron á sesión un total de 16 membros da Corporación. A sesión pódese ver íntegra na canle de YouTube do Concello de Boiro. O pleno saldouse con acordos moi importantes, como por exemplo a aprobación inicial (con 9 votos do PSOE e Boiro Novo) do ditame do Plan de Mobilidade Urbana Sustentábel do Concello de Boiro. O documento PMUS, segundo avanzou o Goberno local en datas recentes, ten como obxecto “establecer unha estratexia orientada a mellorar a mobilidade no municipio, así como a súa competitividade e equidade, aumentando a seguridade e calidade de vida”, en palabras do Executivo, que explica tamén que se ben “Boiro non ten a obriga de contar cun PMUS, este é un documento que precisan os Concellos para a obtención de determinadas axudas, como son aquelas de fondos Next Generation”. Con este estudo detéctanse e identifícanse as necesidades existentes de cara a planificar e coordinar aquelas actuacións que van favorecer a mobilidade e accesibilidade no municipio.
Votacións do pleno
1. Aprobación inicial, se procede, do ditame sobre o Plan de Mobilidade Urbana Sostíbel do Concello de Boiro – aprobación con 9 votos a favor (PSOE, Boiro Novo), 5 votos en contra (PP) e 2 abstencións (BNG).
2. Aprobación inicial, se procede, do ditame sobre a modificación da Ordenanza Fiscal núm. 12 reguladora da taxa polo servizo de cemiterios – aprobación con 8 votos a favor (PSOE), 8 votos en contra (PP, BNG e Boiro Novo) e o voto de calidade do alcalde.
3. Aprobación inicial, se procede, do ditame sobre a modificación do regulamento do funcionamento do servizo de axudas técnicas – aprobación 8 votos a favor (PSOE) e 8 abstencións (PP, BNG, BN).
4. Aprobación inicial, se procede, do ditame sobre a ordenanza municipal reguladora do estacionamento e pernoita de autocaravanas, vehículos camper e caravanas no concello de Boiro – aprobación con 8 votos a favor (PSOE), 2 votos en contra (BNG) e 6 abstencións (PP e BN).
5. Aprobación, se procede, do ditame de aprobación da encomenda de xestión á Mancomunidade de Concellos Ría de Arousa Zona Norte para a realización das accións e tramitacións das licitacións recollidas na solicitude da axuda tramitada co expediente TUR.CAMINO2022-011 – aprobación con 10 votos a favor (PSOE e BNG) e 6 abstencións (PP e BN).
6. Moción do grupo municipal do BNG en relación coa celebración do día 25 de novembro – aprobación con 11 votos a favor (PSOE, BNG, BN) e 5 votos en contra (PP).
7. Moción do grupo municipal do BNG de apoio ás reivindicacións laborais dos bombeiros dos parques de Boiro e Ribeira – rexeitada con 3 fotos a favor (BNG e BN) e 11 en contra (PSOE e PP).
