A Casa da Cultura de Porto do Son vai acoller este venres 17 de novembro a presentación dos libros Marea Morta e 5 (Europa Ediciones), da escritora da nosa comarca Ana Lojo Chan. O acto dará comezo ás 20.30 horas e contará coa presenza da Banda de Música Tradicional Suevia. Contarase coa presenza da concelleira de Cultura de Porto do Son, Alicia Martínez Maneiro.
Ana Lojo Chan (Cabo de Cruz, Boiro, 1978), ademais, de escritora, é unha mestra de Inglés de Infantil e Primaria que empezou escribindo contos para os seus alumnos/as. O chimpo á poesía deuno co obxectivo de “plasmar en palabras os sentimentos de familiares e amizades; e así, a través dos versos, tentar proporcionar outra perspectiva de certas emocións; logrando con cada estrofa transmitir a importancia dos valores”.
Acerca do título do seu novo libro (5), Lojo sinala que se trata do número favorito do seu pai, ademais de ser un punto de unión entre cada un dos poemas (todos teñen cinco estrofas). A autora adianta que a obra foi concibida co obxectivo de que poida ser lida en diferentes idiomas sen necesidade de facer tradución.
