Este venres 10 de novembro unha delegación da veciñanza do lugar de Cabanamoura, en Outes, achegouse ao Concello para manifestar o seu malestar pola decisión de Telefónica de retirar o cobre e deixalos, din, “sen telecomunicacións dignas do século XXI”. Segundo lembran, o núcleo ten “serias deficiencias na cobertura de telefonía móbil” e “non conta coa previsión de que se despregue a fibra óptica en datas vindeiras”. Ante esta situación, que “xa resulta difícil de por si mesma”, engádese “a decisión de retirar o cobre antes de abril do 2023”. Isto, sinalan, “deixaría á veciñanza de Cabanamoura sen unha conexión de telecomunicacións física e sen un servizo básico e necesario”.
O tenente alcalde e concelleiro en materia de comunicación, Anxo Núñez Fernández, aproveitou para “lembrar que esta situación repítese en outros lugares do concello, nomeadamente na parroquia de Outes”, e engadiu que “é inaceptábel que en pleno 2023 se acepte dende o Estado e a Xunta que se retire un servizo básico sen ser substituído pola fibra óptica ou un servizo físico de análogas características.”.
O alcalde, Manuel González López, trasladou á veciñanza o seu “máximo apoio” nesta situación e demandou “que se dote dun servizo digno e de calidade ao noso rural”.
A veciñanza rexistrou unha solicitude para atender esta situación que lle será trasladada dende o Concello ás entidades competentes.
