A Deputación da Coruña aproba un orzamento de 222 millóns de euros para 2024, co Plan Único como principal programa de investimentos

25 Novembro 2023

O pleno deu luz verde aos Orzamentos e aos primeiros 50,5 millóns do Plan Único 2024, que volverá a ser principal programa de investimentos nos concellos.

A área de Emprego sobe un 24% e contempla o impulso a proxectos industriais estratéxicos como a biotecnoloxía, a economía circular e o sector audiovisual, coa construción do maior plató virtual de España na Cidade das TIC da Coruña

A área social (24,3 millóns), o emprego (16 M€) e as obras en estradas provinciais (23,5 millóns ) destacan entre as principais partidas dos Orzamentos 2024.

O orzamento foi aprobado hoxe no pleno cos 17 votos favorables de PSOE, BNG e Alternativa dos Veciños e o voto en contra dos 14 deputados e deputadas do Partido Popular.

O presidente da Deputación, Valentín González Formoso, defendeu que os orzamentos terán como principais prioridades a creación de emprego, o benestar social e o desenvolvemento do rural e destacou a gran importancia de de programas coma o Plan Único de Obras e Servizos (POS+) ou o Plan de Emprego Local (PEL), están sendo fundamentais para a creación de emprego, infraestruturas e oportunidades, en particular nos pequenos municipios da provincia.

O deputado de Facenda, do Grupo Socialista, José Ramón Rioboo, incidiu en que os orzamentos están feitos “desde o rigor económico e a responsabilidade social”, manteñen a “débeda cero” dos últimos nove anos e conteñen importantes incrementos en áreas como acción social (24,3 millóns de euros, un 6,5% máis), Emprego (16 millóns de euros, un 24,1% máis) ou Vías e Obras (23,3 millóns de euros, un 20% máis).

Rioboo destacou tamén “a creación dunha nova área de Mar e Medio Rural” dentro do goberno provincial, con 8,3 millóns de euros consignados, “que contemplan investimentos para confrarías de pescadores, entidades e empresas do sector agrícola e gandeiro e apoio para a promoción de produtos locais, artesanía ou pequeno comercio”.

A deputada do BNG Avia Veira destacou “a apoio ao tecido social”, a “aposta pola cultura, que nos fai o acubillo de centos de entidades culturais” e por un “turismo sustentable, que supón tamén soporte para as pequenas e medianas empresas”.

O portavoz de Alternativa dos Veciños, Ángel García Seoane, censurou que a Deputación “siga aguantando cargas que non tiñamos que ter como os centros educativos, que son competencia da Xunta de Galicia” e considerou que “é necesario seguir incrementando o investimento na área de Vías e Obras, xa que a Deputación conta con máis de 2.000 quilómetros de estradas”.

O portavoz do PP, Evaristo Ben, dixo que o seu grupo “non aproba os orzamentos nin como autorización nin como planificación de gastos” e afirmou que “aínda que non discutimos as virtudes do Plan Único, non entendemos que non se faga un plan específico para obras de saneamento e abastecemento”.

O Plan Único parte con 50,5 millòns en 2024

Ademáis dos orzamentos, o pleno de hoxe aprobou por unanimidade as bases e a primeira achega do Plan Único para 2024, que se incrementa a súa partida inicial nun 10% respecto ao presente ano, chegando aos 50,5 millóns de euros. Unha cantidade que, como todos os anos, irá incrementándose ao longo do exercicio para chegar, a finais de ano, a entre 90 e 100 millóns de euros de investimento nos concellos coruñeses.

Formoso destacou que o Plan Único “supuxo incrementar de 24 a entre 90 e 100 millóns de euros anuais os fondos que reciben os concellos da provincia para financiar obras e servizos, dándolles ademáis absoluta autonomía para decidir o destino dos fondos”.

“Hoxe, os concellos reciben ata catro veces máis fondos da Deputación e teñen total liberdade para decidir en que os invisten”, sinalou o presidente, que considerou que este modelo acaba cos plans finalistas nos que a Deputación marcaba aos concellos en que investir os fondos.

O PEL aposta por industrias estratéxicas en 2024

Nos Orzamentos 2024, o Plan de Emprego Local (PEL) incrementa tamén o seu orzamento en 2024 ata os 16 millóns de euros (un 24,1% máis).

Este incremento no orzamento permitirá reforzar programas de contratación de persoal en empresas e concellos e apoio ao emprendemento, pero ademáis, o PEL apostraá en 2024 por potenciar sectores estratéxicos como a biotecnoloxía, a economía circular ou o sector audiovisual, coa construción de Coruña Estudo Inmersivo (CEI), o maior estudo audiovisual virtual de España, que se ubicará na Cidade das TIC.

Coruña Estudo Inmersivo (CEI) supón un investimento de 8,6 millóns de euros, cofinanciado con fondos do Plan de Recuperación do Goberno de España no marco do proxecto “España, Hub audiovisual de Europa”. A Deputación adxudicou o pasado agosto a Telefónica o desenvolmento da tecnoloxía por 6,1 millóns de euros e vén ten en licitación a construcción do edificio que albergará o CEI por 2,5 millóns de euros.

Política Social e apoio ao Rural

No área de Política Social, a Deputación incrementa este ano o seu orzamento ata os 24,3 millóns de euros (+6,5 %). Os orzamentos inclúen un novo incremento de 100.000 euros para ao programa de Servizos Sociais Comunitarios, que durante o mandato de Valentín González Formoso pasou de 4 millóns a 8,7 millóns de euros anuais, o que permite a contratación de 179 profesionais do ámbito social nos concelos de menos de 20.000 habitantes e o financiamento de 411.000 horas de servizo de axuda no fogar

A partida para apoiar ás entidades sociais da provincia contará o vindeiro ano con 4,6 millóns de euros, uns fondos que permiten apoiar a 273 asociacións da provincia para contratar persoal, mellorar os seus centros ou impulsar programas de rehabilitación, tratamento e inserción sociolaboral que melloran a vida de miles de persoas.

A aposta polo desenvolvemento do rural é tamén un eixo transversal da acción da Deputación da Coruña. A nova área de Mar, Agro e Medio Rural creada neste mandato disporá en 2024 dun orzamento de 8,9 millóns de euros, entre os que destacan os 661.000 € (+29%) destinados a axudas a confrarías de pescadores e mariscadores/as da provincia, os 818.000 € (+33%) para fomento agrícola e gandeiro ou o 1,3 millóns que se destinarán a promoción de produtos locais, artesanía e comercio.

Outras áreas

A área de Cultura incrementa este ano o seu orzamento nun 11,3 % ata os 11.451.4000 euros, con programas como a Rede Cultural, o maior circuito estable de actuacións ao vivo de Galicia, con 2,3 M€ de orzamento ou os 3,6 M€ que a Deputación destina a apoiar ás entidades culturais da provincia nas súas actividades e investimentos.

A área de Deporte contará con 6,6 millóns de orzamento con programas que inclúen 4 millóns de euros para apoiar a máis de 655 entidades deportivas na súa labor de promoción do deporte de base, 1 millón de euros para contratar técnicos de Deportes nos concellos máis pequenos da provincia e bolsas para deportistas, que este ano se incrementan de 45 a 52, cun orzamento de 182.000 €.

A rede provincial de estradas que xestiona a Deputación da Coruña conta con 2.100 quilómetros de lonxitude. O orzamento do departamento de Vías e Obras sobe en 2024 un 20% ata os 23,3 millóns de euros. Deles, 12,6 millóns destínanse a conservación, 2,1 M€ a investimentos, 4M€ a obras urxentes e mantemento e 1,3 M€ a obras de mellora das estradas que se transfiran aos concellos.

A mobilidade sostible seguirá sendo tamén un dos eixes de acción da Deputación da Coruña, que no anterior mandato puxo en marcha 130 novos quilómetros de vías ciclistas en 19 concellos da provincia, entre elas os da Senda ZEC, que bordea o encoro de Cecebre ou a Vía Verde Compostela-Tambre-Lengüelle, a maior Vía Verde de Galicia.

No vindeiro ano, acometerase o tramo da Vía Verde entre Oroso e Santiago e consígnanse 500.000 euros para iniciar un ambicioso proxecto que será realidade antes de 2027, levar a Vía Verde ata Culleredo, co obxectivo de que en poucos anos se poda percorrer a distancia que separa A Coruña e Santiago a través das vías ciclistas da Deputación.

O orzamento da área de Turismo alcanza en 2024 os 6,3 millóns de euros. Un investimento que inlcúe o desenvolvemento dos Plans de Sustentabilidade Turística (PSTD) de Cabo Ortegal, Fragas do Eume, Fogóns do Anllóns ,Vía Verde e Baterías de Costa de Ferrolterra, que suman máis de 4 millóns de euros.

Asignación de fondos do POS+2024

Outros artigos

Morre en accidente o músico noiés Brais Tomé

Noia está novamente de loito, tras confirmarse o falecemento este pasado serán (o luns 26), en accidente de tráfico, do músico local Brais Tomé, membro do coñecido Dúo Togayán. O Concello e a Corporación local mandan dende as redes sociais o seu profundo pésame á...

+

A Deputación da Coruña apoia o labor de Misela, Renacer e ADISBISMUR

O presidente provincial, Valentín González Formoso, nunha visita á sede de Misela, en Noia A Deputación da Coruña publicou no BOP deste luns 26 de febreiro a concesión provisional das subvencións dirixidas a entidades sen fins de lucro para o mantemento de programas e...

+

Martes con nubes e claros

As altas presións irán entrando de xeito progresivo durante esta xornada, de xeito que a estabilidade irá en aumento, o que deixará un día de ceo parcialmente nubrado, con apertura de grandes claros pola tarde. As temperaturas non terán cambios significativos. Os...

+

Publicidade

Revista en papel

Opinión

“O medo fala. Consecuencias” – Manuel Domínguez

“O medo fala. Consecuencias” – Manuel Domínguez

O 26 de febreiro publicaba neste mesmo medio, sobre a ameaza de Donald Trump e as súas consecuencias, podería parecer unha opinión, pero non, non, está baseada en feitos. En ano 2004 cando os países bálticos liberáronse das garras comunistas das URSS e pasou a...