Este sábado 2 de decembro a Comisión pola Recuperación Histórica do Barbanza (CRMH) organiza a proxección do documental Ciudad de la Selva no Auditorio de Ribeira.
O filme Ciudad de la Selva narra a historia da resistencia contra a ditadura nos montes de Casaio, unha parroquia montañosa de Carballeda de Valdeorras onde un grupo de homes e mulleres organizaron un asentamento destinado a dar respaldo loxístico á guerrilla antifascista.
A proxección comezará ás 18h e contará coa presencia do director do documental, Miguel Riaño, que presentará o filme e con quen as persoas asistentes terán a oportunidade de manter un coloquio tras o visionado da súa obra máis recente.
A proxección conta co apoio da Deputación da Coruña.
Ciudad de la Selva é a crónica cinematográfica da derradeira fronte de batalla da Guerra Civil española a mediados dos anos 40. A historia deste grupo de refuxiados (fuxidos), que tratan de sobrevivir coa esperanza de que, ao final da Segunda Guerra Mundial, os exércitos aliados interveñan tamén en territorio español.
Tralo alzamento militar de 1936, moitos civís vense obrigados a desprazarse buscando un lugar seguro á espera do fin da guerra. A Ciudad de la Selva xorde como un asentamento de desprazados nos montes de Casaio (Ourense) que reúne, fundamentalmente, a galegos e asturianos opositores ao novo réxime franquista. Hoxe, grazas a un gran número de achados arqueolóxicos e ao testemuño de expertos e persoas que se relacionaron directamente con este grupo de disidentes, podemos reconstruír a historia destas persoas e saber que sucedeu nos montes de Casaio desde que formouse o poboado ata o cruento final da guerrilla a mans da Garda Civil en 1946.
