A comunidade da asociación inclusiva Amicos, con sedes principais en Ribeira e Boiro, celebrou este xoves 16 de novembro a súa festa de magosto. Houbo castañas asadas, música, baile e varias actividades lúdicas. Nela participaron os usuarios do centro de día, do centro de atención temperá e as e os integrantes do equipo da asociación.
As instalacións do centro de atención integral de Boiro acolleron a tarde deste xoves, 16 de novembro, o magosto de Amicos. Deste modo, a principal atracción da festa, que comezou arredor das 15.00 horas, foi unha máquina de asar castañas das que adoitamos ver polas rúas galegas.
Como dixemos, con motivo da celebración, no centro reuníronse os beneficiarios do centro de día, os “amicos” e “amicas” do centro de educación temperá e do equipo da asociación. Todos eles degustaron unhas saborosas castañas ao tempo que desfrutaban da música, o baile e actividades como a pintura facial.
Ademais, durante os primeiros días desta semana, todos os mozos e mozas do centro botaron man da súa creatividade para crear unhas caixas personalizadas como alternativa aos típicos cornetes. Estas contaban con dous compartimentos separados, nos que gardar nun lado as castañas asadas e no outro as cascas.
