Aqueles que un día deron en dicir que “España vai ben” son os mesmos que agoiran actualmente que España vai tan sumamente mal que será comida polos lobos do independentismo grazas a que o candidato socialista á presidencia do Goberno (por mandado do Rei de España, Felipe VI) está a por en mans de ERC, Junts e Bildu a posibilidade de despezar un reino que o é grazas a que Franco designou a Juan Carlos de Borbón “sucesor a título de Rei”.
E como non hai Rei sen reino, aqueles que obviaron inicialmente a Constitución española, reclaman Constitución sen saber se o candidato Pedro Sánchez vai incumprir a Carta Magna en algún dos seus artigos sen querer recoñecer que eles sí pasan por riba da mesma Constitución (cuxo cumprimento reclaman) cando, como é coñecido, levan case que cinco anos -que se cumpren dentro de dous meses- sen renovar o órgano de goberno do Poder Xudicial (Consello Xeral do Poder Xudicial), a quen corresponde “velar pola garantía de independencia dos xuíces e maxistrados” que preside o titular do Tribunal Supremo.
Do Poder Xudicial forman parte organismos tan trascendentais como o devandito Tribunal Supremo, a Audiencia Nacional, os Tribunais Superiores de Xustiza, as Audiencias provinciais, os xulgados de primeira instancia e instrución, e outros órganos xurisdicionais profesionais e non profesionais e consuetudinarios e da xurisdición militar de España, que teñen a potestade de administrar xustiza.
O Poder Xudicial é, como ben se sabe, un dos tres grandes poderes do Estado español. É un poder único para todo o Estado, partindo do principio segundo o cal a xustiza emana do pobo e esta é administrada no nome do rei. Os presidentes dos respectivos órganos xudiciais superiores son nomeados a proposta do Consello Xeral do Poder Xudicial, polo Rei, mediante Real Decreto, e permanecen non seus cargos cun mandado de cinco anos que pode ser posteriormente renovado. Este é un caso de grave incumprimento en España por canto esa renovación non se levou a cabo pola negativa reiterada do maior partido da oposición ata o pasado 23J e que debera ser cumprimentado en decembro de vai cinco anos. Así o estabelece a Constitución tantas veces mencionada, que dictamina que o Consello Xeral do Poder Xudicial (CXPX) debe renovarse “na súa totalidade” cada cinco anos, contados desde a data da súa constitución.
Se a Constitución obriga a todos os españois, que é o que impide no caso do actual PP, renovar o CXPX?.
Talvez non convén aos intereses deste partido dada a posibilidade de que o Consello estea formado, unha vez se constitúa un novo goberno -se este é presidido polo PSOE- por unha maioría progresista?.
Quen incumpre, xa que logo, a Constitución na España que “ía ben” e agora semella que non?. Que motiva que os presidentes do Congreso e o Senado non tomen cartas neste asunto?.
…
